Monday, February 13, 2012

මේ දවස් වල ටිකක් රෑට රඟපානවා වැඩියි..

රෑට මේ චරිතයේ රඟපෑම් වැඩියිපෘථිවි ප්‍රභා ගැන අනුරුද්ධිකා කතාකරයි
නිර්මාණ රැසක නැතත් ඉඳහිට රඟපෑ චරිතයකින් දෙකකින් රසික ප්‍රසාදය උපරිම අයුරින් දිනාගත් අනුරුද්ධිකා පාදුක්‌කගේ මේ දිනවල සිය ජීවන රඟහලේ ප්‍රබල භූමිකාවක්‌ නිරූපණය කරන්නීය.

කොහොමද අලුත්ම චරිතය?

"අම්මෝ හරිම අමාරු රඟපෑමක්‌ තමයි. කිසිම විවේකයක්‌ නැහැ. එක දිගටම රඟපාන්න ඕනෑ. පොඩ්ඩක්‌වත් වරදන්න බැහැ. වැරදුණොත් ඉවරයි.

වැඩිපුර රඟපාන්නේ දවාලට ද රෑටද?

"රෑ කාලයේ රඟපෑම් වැඩියි. දවල්ට පුංචි විවේකයක්‌ ලැබෙනවා. ඒත් එක දිගට රාත්‍රී කිහිපයක්‌ ම නිදි වර්ජිතව රඟපෑවා.


ඔහොම රඟපෑවොත් අසනීප වෙන්නත් පුළුවන් නේද?

ඔව් දැනටමත් අධික වෙහෙස සහ නිදිමැරීම නිසා ඇඟට පතට අමාරු ගතියක්‌ තියෙනවා. ඒත් ඉතිං දැන් මේ චරිතයෙන් මිදෙන්න බැහැ. රඟපාන්නම වෙනවා.

විවේක ගන්න ක්‍රමයක්‌ ඇත්තේම නැද්ද?

"බොහෝ වෙලාවට කෙටි විවේකයක්‌ ලැබුණු ගමන්ම නිදාගන්නවා.

කෑමට බීමට වෙලාව කොහොමද?

"ඒකත් රඟපාන ගමන් තමයි. මගේ අම්මාගෙන් ලොකු සහයෝගයක්‌ ලැබෙනවා. මටවිවේකයක්‌ ලැබෙන හැම වෙලාවකම අම්මාගේ උදව්වෙන් ඒ විවේකය උපරිම අයුරින් මම ලබා ගන්නවා. සමහර දවස්‌වලට තාත්තාත්, මගේ සැමියාත් මට උදව් කරනවා.

මේ ගත කරන්නේ චරිතයේ අමාරුම රඟපෑමද?

"අතිශයින්ම අමාරු කොටස රඟපාලා ඉවරයි. මීට හරියට මාසයකට කලින් ඒ කොටස රඟපාලා නිමවුණා. දැන් වුණත් ලේසි නැහැ.

තව කොච්චර කාලයක්‌ මේ විදිහට රඟපාන්න වෙයිද?

"අඩුම වශයෙන් මාස 6 ක්‌ වත් මේ කැපකිරීම කරලා උපරිම රඟපෑමක්‌ කරන්න වේවි. ඊට පස්‌සේ තරමක සහන කාලයක්‌ උදාවේවි කියලා හිතනවා.

මේ නිර්මාණයේ පිටතට කාගෙද?

"ඒක ඉතිං මගේ සැමියාගේනේ?

ඔහු ගැනත් කියනවා නම් හොඳයි නේද?

"ඔව් එයා නාලක විඡේවර්ධන. හොරණ ශ්‍රීපාලි විශ්වවිද්‍යාලයේ ජනසන්නිවේදනය පිළිබඳ කථිකාචාර්යවරයෙක්‌ ලෙස කටයුතු කරනවා.

මේ වගේ රඟපෑමකට මුල පිරුවේ කොයි කාලෙද?

පසුගිය වසරේ මාර්තු මාසයේදියි.

මෙම චරිතයේ අමාරුම කොටස රඟපෑවේ කොහේදීද?

"ජයවර්ධනපුර රෝහලේදීයි. විශේෂයෙන්ම එම රෝහලේ ප්‍රසව හා නාරිවේද විශේෂඥ වෛද්‍ය මාධව කරුණාතිලක මහතා ප්‍රධාන රෝහල් කාර්ය මණ්‌ඩලයට මාගේ ස්‌තුතිය ඒ වෙනුවෙන් පිරිනමනවා.

ඔබගේ අධ්‍යාපන කටයුතුවලටත් මේ චරිතය නිසා බාධා වුණා නේද?

ඔව්. මම ජයවර්ධනපුර විශ්වවිද්‍යාලයේ සමාජ විද්‍යාව පිළිබඳ ශාස්‌ත්‍රපති උපාධිය සඳහා සූදානම් වෙමිනුයි හිටියේ. ඒ කටයුතු අතරමැද නැවතුණා.

නැවත ඒ ගැන උනන්දුවක්‌ නැද්ද?

"තව අවුරුද්දකින් විතර පස්‌සේ නැවත උත්සාහ කරනවා.

එතකොට වේදිකා නාට්‍ය, ටෙලි නාට්‍ය රංගනයන් භාර ගන්නේ කොහොමද?

"කොහොමටත් අවුරුද්දක්‌ දෙකක්‌ යනතුරු මේ චරිතයෙන් මිදෙන්න මට බැරි වෙනවා. විවේකය ලැබෙන විදිහට හොඳ චරිතයක්‌ ලැබුණොත් භාර ගන්නවා.

ඉතිං දැන්වත් මේ චරිතය මොකක්‌ද කියා කියනවාද?

මේ මගේ ජීවිතයේ බැරෑරුම් ම චරිතය වන මවු පදවියයි. මීට මාසයකට පෙර මට පුතෙක්‌ ලැබුණා අපි දෙන්නාම එයාට "පෘථිවි ප්‍රභා" කියලා නම දැම්මා.

No comments:

Post a Comment